Младите до 35 години од Општина Гази Баба се ослободуваат од плаќање комуналии за изградба, доградба или надградба на својот прв дом, објави градоначалникот Бобан Стефковски, додавајќи дека станува збор за исполнување на едно од ветувањата во предизборната програма.
Мерката првично требаше да се однесува на младите до 29 години, но старосната граница е зголемена за да опфати што поголем број семејства со намера да го изградата своето прво живеалиште, појаснува тој.
Условите се: кандидатите да имаат најмногу 35 години на денот на поднсеување на барањето, да се жители на Општината, да градат, доградуваат или надградуваат прв дом во нивна сопстевност, тој да се гради исклучиво за лични станбени потреби, да се поднесе комплетна техничка документација според Законот за градење и и објектот да се користи за сопствено домување најмалку 10 години.
„Со оваа мерка ги стимулираме младите да останат тука, во нашата општина, да создадат свој дом, своја иднина и своја приказна. Ги повикувам сите млади брачни парови да ја искористат оваа можност и да го направат следниот чекор кон својот дом, своето семејство и својата иднина“, порача Стефковски.
Идентична мерка од април годинава се применува и во Општина Аеродром.