Поранешната претседателка на Антикорупциска денеска се очекува да даде исказ во Обвинителството по кривична пријава поднесена против неа од страна на физичко лице
Од Јавното обвинителство не откриваат ниту кој е подносителот, ниту за кое кривично дело станува збор.
Од ЈО истакнуваат дека повикот за распит не е поврзан со нејзината кандидатура, туку дека поканата до Министерството за внатрешни работи ја испратиле уште на 25 јули, а времето на доставата се совпаднало со нејзината одлука да влезе во изборната трка.
На Ивановска ѝ била понудена можност распитот да се одложи за по локалните избори доколку таа смета дека поканата може да се протолкува како притисок во текот на изборната кампања.
„Со оглед на нејзината јавна реакција, надлежниот јавен обвинител телефонски ја контактираше Ивановска и ѝ даде можност, доколку сака и доколку исказот го чувствува како форма на притисок, истиот да се помести по завршувањето на изборите,“ наведоа од Обвинителството.
Ивановска, пак, реагираше дека поканата ја добила само 11 часа откако ја соопшти својата кандидатура, но додаде дека нема намера да ја одложи постапката и оти ќе се појави во Обвинителството бидејќи нема што да крие.
Пријавата за која преземаат дејствија е поднесена уште на 18 февруари годинава.