Иако поминаа повеќе од три месеци, Апелациониот суд во Битолa сè уште не донесе одлука по жалбите на струшкото обвинителство, во врска со случаите каде што обвинет беше поранешниот градоначалник на општината, Рамиз Мерко. Струшките обвинители побараа ефективна затворска казна за сите случаи. Додека досиејата за Мерко останат во фиоките на Апелациониот суд, нема одговор.
„Предметите се примени во август и октомври 2025 година и сè уште не се решени“, велат од Апелациониот суд, Битолa за Алсат ТВ.
За незаконското назначување директори во пет училишта, Мерко се извлече само со парична казна од 12.500 евра и условна казна. Тој избега и од затвор за купување луксузен автомобил „Ауди А6“ вреден 67.000 евра, за кој новиот градоначалник, Менди Ќира, предупреди дека ќе го продаде.
„Предметите се во Апелациониот суд во Битолa и сè уште се чека одлуката по жалбите. Доколку оценат дека имало прекршување на постапката, тогаш предметот ќе биде вратен на повторно судење. Доколку сметаат дека има нешто поврзано со санкцијата, тогаш претпоставувам дека ќе бидат променети или можеби дури и потврдени. Сепак, додека не донесеме одлука, ова останува само шпекулација“, изјави Јордан Јованов – судија.
Неодамна, против Мерко и уште четири лица, полицијата поднесе кривична пријава за уривање на куќата-музеј на Владо Малески во Струга. Јавното обвинителство вели дека е отворен предмет и дека се издадени неколку наредби за проверка, вклучувајќи го и соодветното вештачење.
„Обвинителството продолжува да обезбедува докази, по што ќе се донесе одлука“, велат од Јавното обвинителство, Струга.
Во моментов, против Мерко, кој е на црната листа на САД, се активни три случаи. На 24 декември, во Струга продолжува судењето за осветлувањето што го поставил на коритото на реката Црн Дрим. Тој е обвинет за пречекорување на овластувањата и потпишување договор за реализација на проектот за осветлување со 300 светилки во должина од 900 метри. За реализација на проектот, на правно лице од село Мислодежда му се исплатени 6,8 милиони денари. Истиот ден, продолжува судењето за нелегално поставување спомен-плоча на општинската зграда. Мерко е исто така еден од обвинетите за неовластена изградба на објект во хотел во Струга. Судењето што се одвива во Основниот суд во Битолско сè уште не е започнато.