Аргументирајќи ги осумте услови од Хрватска за продолжување на евроинтегративниот пат на Црна Гора, премиерот Андреј Пленковиќ се повика на блокадите од Бугарија и од Грција за Македонија за да го поткрепи конструктивниот пристап на неговата земја кон Подгорица, според него.
„Ја потенцирам конструктивната позиција на Хрватска. Го имате примерот со Северна Македонија, која уште во 2000 година, кога го имавме загрепскиот самит на врвот, беше пред Хрватска во институционален поглед. Пред Хрватска. А тие сè уште не ги отворија преговорите. Постојат две држави кои од 2005 до 2026 година ѝ зедоа 21 година институционално приближување на Северна Македонија кон Европската унија. Хрватска не го зазеде тој пристап. И покрај тешкото наследство, ние пристапивме многу конструктивно кон Црна Гора и во тој конструктивен процес ги издвоивме оние точки за кои сметаме дека Црна Гора треба да ги исполни“, изјави Пленковиќ во пресрет на дводневниот состанок на Европскиот совет во Брисел со процесот на проширувањето на Унијата како една од точките на дневниот ред.