Денеска, во просториите на Мобилната единица за безбедност на сообраќајот на патиштата при Секторот за сообраќајни работи, беше организирана новогодишна дружба за дечињата на вработените во оваа организациска единица на Министерството за внатрешни работи. По тој повод, Дедо Мраз им подели новогодишни пакетчиња и внесе празнична атмосфера исполнета со радост и насмевки.
Дедо Мраз пристигна на несекојдневен и симболичен начин – со сообраќајно полициско возило, што дополнително го привлече вниманието и воодушевувањето кај најмладите. Дечињата уживаа во заедничката дружба, фотографирањето и празничното расположение, кое продолжи и во просториите на Секторот.
Покрај новогодишните подароци и најдобрите желби за здравје и среќа, Дедо Мраз им упати и пригодни пораки до дечињата, потсетувајќи ги на значењето на почитувањето на сообраќајните правила и одговорното однесување во сообраќајот, со цел сите да бидеме безбедни учесници на патиштата.
Со ваквите активности, Министерството за внатрешни работи ја негува грижата за вработените и нивните семејства, притоа испраќајќи силна порака за важноста на сообраќајната култура и безбедноста од најрана возраст.
