Целосна реорганизација на распределбата на предметите во Јавното обвинителство најави новиот државен јавен обвинител Ненад Савески, кој откри дека институцијата ја затекнал во состојба на, како што рече, сериозен организациски хаос.
На брифинг со новинарите, Савески соопшти дека ќе ги повлече сите дадени овластувања за постапување по предмети, со исклучок на неколку случаи, со цел воспоставување ред и контрола во работата на обвинителите.
Меѓу предметите кои индиректно ќе бидат засегнати од оваа одлука се и „Талир 1“ и „Талир 2“, за кои досега беше овластена обвинителката Ленче Ристоска. Иако Савески нагласи дека не станува збор за таргетирана мерка, не ја исклучи можноста тие предмети да бидат прераспределени.
„Немам донесено одлука за иземање на Ристоска од конкретни предмети. Сепак, ќе ги повлечам сите овластувања во сите предмети, освен оние за Кочани, Ресен и Крива Паланка“, изјави Савески.
Тој посочи дека во институцијата нема прецизна евиденција за тоа кој обвинител кои предмети ги води, што дополнително ја отежнува работата. Според него, овластувања биле доделувани од различни нивоа на обвинителството, па дури и обвинители од едни судови постапувале по предмети во други обвинителства.
Савески истакна дека донесената одлука е техничка и има за цел воспоставување функционален систем, а не политичко влијание.
„Ако го почитувате мојот интегритет, моите одлуки не треба да ги нарекувате политички. Никогаш не сум бил член на политичка партија“, порача тој.
Во однос на конкретни обвинители, Савески нагласи дека нема намера да фаворизира никого.
„Мене не ми е важно кој обвинител води одреден предмет, ниту кој е обвинет. За мене сите случаи се еднакви“, рече тој, додавајќи дека нема да постапува под политички притисоци, туку исклучиво согласно закон.
Објаснувајќи зошто одредени предмети нема да бидат опфатени со мерката, Савески посочи дека во обвинителствата во Ресен и Крива Паланка во моментов нема доволно кадар, додека случајот за Кочани е исклучително комплексен и бара континуитет во постапувањето.
Тој информираше дека одлуката веќе е донесена и наскоро ќе биде доставена до сите обвинителства, со што ќе започне процесот на нова распределба на предметите и воспоставување системска контрола во институцијата.