„Никогаш не заборавајте дека ние не си припаѓаме себеси. Нашите животи веќе се жртвувани на олтарот на каузата и кој и да ја изгуби оваа свест, престанува да биде револуционер. Затоа, да не се плашиме од смртта. Каде и да нè посети, да ја дочекаме со презир – и да ја победиме!“ – ова е дел од знаменитиот говор на Гоце Делчев, идеологот и водачот на македонската револуција, што го одржал на 23 јануари 1902 година пред македонските четници во селото Жерве, кое се наоѓа на 23 километри западно од Воденско, во Егејскиот дел на Македонија, денес во Грција.
Оваа вонвременска мисла на Делчев, која моќно одекнува со сета своја сила и денес, по 124 години, ја запишал четникот Христо Силјанов во своите „Писма и записи на еден четник“, изнесувајќи сеќавања во нив и за својата средба со Гоце Делчев во селото Зелениче, во првите денови по Новата година во 1902- рата. Силјанов бил четник во четата на војводата.
Денеска е 4 февруари. Ден кога во 1872 година е роден македонскиот горостас Гоце Делчев. Овие редови му го посветуваме нему.