Владата на Република Македонија ја продолжува мерката за намалување на данокот на додадена вредност (ДДВ) за дизелот од 18 на 10 отсто. Новата одлука важи до 20 октомври 2026 година.
Министерката за финансии Гордана Димитриеска-Кочоска ја објави оваа информација на својот Фејсбук-профил. Според нејзините зборови, целта е јасна: ублажување на ценовните притисоци врз домаќинствата и стопанството, како и зачувување на економската стабилност.
„Продолжуваме со мерките за заштита на стандардот на граѓаните и стабилноста на домашната економија. Владата ја продолжува мерката за намалување на ДДВ за дизелот од 18 отсто на 10 отсто, до 20 октомври 2026 година. Со оваа мерка влијаеме врз малопродажните цени на горивата и ги ублажуваме надворешните ценовни притисоци, со цел да го намалиме финансискиот товар врз граѓаните и стопанството“, напиша Димитриеска-Кочоска.
Таа додаде дека надлежните институции внимателно ги следат движењата на глобалните берзи и се подготвени навремено да реагираат.
„Продолжуваме внимателно да ги следиме состојбите на меѓународните пазари и навремено да реагираме со мерки што придонесуваат за заштита на животниот стандард и економската стабилност“, истакна министерката.
Со оваа одлука Владата продолжува да интервенира во цените на горивата, со цел да го олесни товарот врз граѓаните и компаниите во услови на надворешни ценовни притисоци.