Заменик-министерот за надворешни работи, Зоран Димитровски, оцени дека Македонија го има клучниот проблем да ги почне преговорите со Европската Унија, а тој проблем е билатерален и наметнат од Бугарија, иако Софија постојано тврди дека станува збор за работа со ЕУ.
Во интервју за МИА, Димитровски посочи дека претходната власт не требало да го прифати францускиот предлог, бидејќи со тоа Софија доби можност да го користи правото на вето за сите прашања од преговарачката рамка.
„Историските и идентитетските прашања не требаше да бидат дел од преговарачката рамка“, рече тој.
Тој нагласи дека се потребни механизми со кои билатералните блокади ќе престанат да бидат пречка во преговорите.
„Доколку се создаде механизам во Европската комисија – а мислам дека тоа се намерите и на германската и на француската страна – да не бидат можни блокади за билатералните прашања од идентитетски и историски карактер, тоа навистина ќе ни помогне да ги отвораме и затвораме поглавјата“, додаде Димитровски.
За акцискиот план за малцинствата
Тој ја критикува блокадата на Акцискиот план за малцинствата од страна на Бугарија, истакнувајќи дека документот е составен со европски експерти, консултирани се сите етнички заедници и дека тој ќе ги подобри правата на сите малцинства, вклучително и на оние кои се чувствуваат како Бугари.
„Добивме бланко-блокада. Немаат конкретни забелешки на документот, туку само велат дека нема да разговараат додека не ги направиме уставните измени“, рече заменик-министерот.
За новите европски иницијативи
Димитровски ги оцени новите иницијативи (нон-пејпер на Макрон и Мерц) како силен поттик за проширување, но нагласи дека за Македонија клучно е да се отворат преговорите и да се создаде механизам против билатерални вета.
Тој ја поздрави и изборот на Македонија за членка на Економскиот и социјален совет на Обединетите нации (ЕКОСОК) за периодот 2027–2029 година, оценувајќи го како „голем дипломатски успех“.