Поранешниот пратеник Илија Димовски со малку поинаква честитка за Денот на независноста на Република Македонија.
„Честит 8 Септември! Ден на независноста на Република Македонија!
Независноста не е календарски датум.
Независноста ја славиме на овој ден, но ја добиваме или ја губиме секој друг ден.
Со секое зрно храна што го увезуваме, а можеме сами да го произведеме, ја губиме независноста.
Со секоја спортска победа што нè обединува, ја добиваме независноста.
Со секој туѓ шунд што го прифаќаме, ја губиме независноста.
Со секое дело на култура и уметност по кое светот нè препознава, ја добиваме независноста.
Со секој иселен Македонец, ја губиме независноста.
Со секој наш повратник од светот, ја добиваме независноста.
Со секој намален ранг на нашите универзитети, ја губиме независноста.
Со секој успех на нашите деца по олимпијадите на знаење, ја добиваме независноста.
Со секој загаден ќош, застанат воз, затворена врата во болница, ја губиме независноста.
Со секој километар пат, отворена фабрика или театарска зграда, ја добиваме независноста.
Независноста не е завршен процес, туку недовршена задача.
Независноста не се брани со очај и бес, туку со ум, разум и вредносен систем што ќе им даде сила на добрите, паметните и чесните.
Нека е честит Денот на независноста на Република Македонија!
Нека е вечна идејата за слобода и независност на Македонија!“порача Димовски на Икс.