Според ДУИ, одлуката на Уставниот суд е непосреден повод за протестот, но незадоволството, како што наведуваат, е пошироко и се однесува на, според нив, „слабеењето на механизмите што произлегуваат од Охридскиот рамковен договор“.
Од партијата тврдат дека Советот на Општина Тетово ја донел одлуката за именување на улиците „во согласност со законот и со потребното двојно мнозинство“. Исто така, од ДУИ тврдат и дека „Владата не реагирала во законски предвидениот рок, што, според Законот за локална самоуправа, значело дека актот е одобрен“. „Интегристите“ наведуваат дека „одлуката повторно била усвоена за да се отстранат сите процедурални дилеми, но и тогаш Владата не презела никакви мерки“.
Според ДУИ, „одлуката за именувањето на улиците била дел од правниот поредок речиси две децении“, а најновата одлука на Уставниот суд, наводно, „создава преседан што отвора прашања за правната сигурност и за начинот на кој се третираат прашањата поврзани со Охридскиот рамковен договор“. Партијата на Али Ахмети ја критикуваше и Општина Тетово, наведувајќи дека „во текот на постапката пред Уставниот суд не доставила побарани појаснувања и документација“. Со тоа, според ДУИ, „не успеала правно да ја одбрани сопствената одлука“.
Во соопштението на ДУИ се посочува и дека „идните одлуки на Уставниот суд, меѓу кои и очекуваната одлука за Законот за употреба на јазиците, треба да бидат засновани на Уставот, Охридскиот рамковен договор и принципот на правна сигурност“.