Претседателот на СДСМ, Венко Филипче, одговарајќи на новинарско прашање, денеска најави дека приватно ќе го тужи доктор Жан Митрев поради нарушување на честа и угледот откако Обвинителството ќе заврши со предметот.
– Ова сѐ се темели на една голема лага. Зошто? Ако Жан Митрев бил жртва на таков рекет како што кажува, што правел досега? Второ, зошто тој не поднесува тужба, туку обвинителство по допрен глас? Но, како и да е, нека ја завршат анализата итн., согласно одлуката, а после тоа откако ќе се утврди дека тоа не постои, јас немам никаква вина, ќе го тужам приватно за нарушување на честа и угледот – рече Филипче.
Тој потенцираше дека за своите чест и углед работел напорно и чесно, и дека нема да дозволи „бандитски работи да му ги нарушуваат честа и угледот“, што за него се најважни во животот.
Обвинителството вчера соопшти дека постапува и веќе презема дејствија на проверки во предметот оформен по допрен глас на 21.1.2026 година од страна на Јавното обвинителство, по однос на јавно изнесените наводи од доктор Жан Митрев.