Според плусинфо во СДСМ ескалира внатрешната криза по серијата критики од истакнати поранешни и актуелни членови кон раководството и начинот на комуникација на партијата.
По нападите врз поранешниот градоначалник на Скопје Петре Шилегов и други критичари кои побараа оставка од лидерот Венко Филипче, Центарот за комуникации на СДСМ се насочи кон Јован Деспотовски, поранешен кандидат за претседател на партијата.
Повод е авторска анализа на Дојче Веле од новинарката Катерина Блажевска под наслов „Како речникот на СДСМ го убива имиџот на партијата“, во која Деспотовски отворено го критикува агресивниот и несоодветен јазик во партиските соопштенија.
„Во право сте кога забележувате промени во последно време. За жал, не се само новинарите, односно медиумите, тие што генерално го забележуваат тоа, туку и поширок круг на наши сограѓани. Нема да коментирам одделни случаи, изнесени политички ставови, ниту „цели“ на овие соопштенија. Но, отворено ќе кажам дека јазикот што сега се користи, помалку личи на оној СДСМ, кој сите искрени членови и поддржувачи, па и пошироката јавност сака да го види повторно“ – изјави Деспотовски за Дојче Веле.
Тој нагласи дека таквиот пристап не е вистинскиот начин за враќање на довербата кај граѓаните.
На денешниот брифинг со новинарите, лидерот Венко Филипче, без директно да го спомене Деспотовски по име, обвинува дека зад критиките стои организирана акција на ВМРО-ДПМНЕ за уривање на СДСМ одвнатре.
„Наши поранешни функционери, еден поранешен функционер, други двајца, претходно едниот којшто не се појавил во јавноста со години, некои луѓе коишто не се веќе во партијата, туку заминале во предавничката ЗНАМ, сега наеднаш во овој момент излегуваат и се активираат и се гласни на јавните мрежи“ – рече Филипче.
Центарот за комуникации на СДСМ подоцна издаде соопштение во кое развива теории на конспирација, тврдејќи дека критиките се дел од кампања за дестабилизација на партијата „одвнатре“, координирана од центарот на СНС (владејачката партија во Србија).
Партијата го обвини Деспотовски дека неговите изјави за Дојче Веле се координирани со „порталот на Геро “, бидејќи текстот таму бил објавен кратко по анализата на Дојче Веле.
Филипче дополнително ја обвини актуелната власт за имитација на стилот на српскиот претседател Александар Вучиќ, нарекувајќи го премиерот Мицкоски „малиот Вучиќ“, но и вакви слични обвинувања за „српско влијание“ СДСМ претходно ги упати и кон поранешниот градоначалник на Центар Саша Богдановиќ, кого го нарече „координатор на СНС за Македонија“.
Познавачи на приликите во СДСМ овие напади ги врзуваат со нервоза во раководството пред партискиот конгрес најавен за 24 јануари 2026 година.
Целата вест можете да ја прочитате на порталот на плусинфо