Купишта ѓубре, смрдеа, црви, бубачки и потенцијални извори на зараза. Ваква е сликата во Долно Лисиче во период кога температурите надвор се и над 40 степени, а ѓубрето многу лесно се замирисува, објави МКД.мк. Јавното претпријатие Комунална хигиена на ова место доаѓа понекогаш и еднаш во месецот, а вработените остануваат „глуви“ на телефонските повици да дојдат да го соберат сметот за кој сите жители уредно плаќаат. МКД.мк веќе пишуваше за овој проблем, но тој не се реши.
Но, сликата не е ваква само летово, туку речиси цела година. Кантите во Долно Лисиче Комунална хигиена ги празнеше секој петок, но последната година за ова треба посебни молби и поплаки од граѓаните, па дури тогаш некој да се сети дека и овие жители, како и сите останати скопјани заслужуваат чисти улици.
Залудни се јавувањата и молбите на граѓаните на телефонските броеви на Комунална хигиена, бидејќи оттаму постојано велат дека ќе поминат, но ѓубрето си стои, а причината зошто е ваква состојбата никој не ја кажува. Можеби некој ќе сфати дека никој, а особено не граѓани кои се редовни плаќачи не заслужуваат да живеат во вакви услови, каде на секое ќоше и пред секој двор на улицата постои опасност од потенцијална зараза.