Грчката амбасада во Скопје упатила официјален протест до Министерството за надворешни работи на Македонија поради транспарент истакнат од навивачите на МЗТ Скопје, на кој Македонија е прикажана како територија што се протега сè до Солун и Халкидики.
Транспарентот бил истакнат за време на кошаркарскиот натпревар на МЗТ против грчкиот клуб „Ираклис“ во Скопје, одигран на 6 октомври во рамки на квалификациите за ФИБА Купот на Европа.
За гостите проблем е мапата што допира до Солун.
Транспарентот, кој грчкиот јавен сервис ЕРТ го опиша како националистички по содржина, бил поставен на централната трибина во арената „Јане Сандански“. На него е прикажана мапа на која има делови од Грција, вклучително и Халкидики, како и делови од Србија, Албанија и Бугарија. Според грчките медиуми тие биле претставени како територија на Македонија.
Врамен со симболот „Сонцето од Вергина“, транспарентот го носел слоганот: „Ќе го браниме твоето свето име низ целиот свет“.
Амбасадата во демаршот се повикува на Договорот од Преспа.
Одговарајќи на прашање од локалниот информативен портал „360 Степени“, грчката амбасада потврди дека го покренала прашањето пред Министерството за надворешни работи на Северна Македонија.
„Амбасадата го покрена прашањето за истакнувањето на транспарентот, вклучително и фактот дека, според информациите со кои располагаме, тој бил истакнат во присуство на министерот за спорт на Македонија“, соопштиле од амбасадата.
„Посочивме дека содржината и симболиката на транспарентот се во спротивност со обврските и духот на Договорот од Преспа. Затоа, прашањето беше пренесено до надлежните органи на Северна Македонија преку соодветните дипломатски канали.“
Од клубот „Ираклис“ реагирале пред почетокот на натпреварот.
„Ираклис“, клубот од Солун познат под прекарот „Старецот“ (Гиреос), поднесе официјална жалба до комесарот на натпреварот поради провокативниот транспарент и ја известил грчката амбасада во Скопје.
ЕРТ објавува дека раководството на клубот, уште пред почетокот на натпреварот, поднело жалба до ФИБА барајќи транспарентот да биде отстранет. Клубот исто така ја известил грчката амбасада и упатил жалба до министерот за надворешни работи на Македонија. Во тој извештај, натпреварот бил опишан како прво коло од настапот на „Ираклис“ во Купот на Европа на ФИБА.