Александар Јорданов, поранешен европратеник и амбасадор на Бугарија во Скопје од 2001 до 2005, удри по извештајот на Европскиот парламент за напредокот на Македонија на патот кон Европската унија и кон известувачот Томас Вајц.
„Извештајот за напредокот на Северна Македонија во Европскиот парламент плаче за Обвинителство“, изјави Јорданов, кој објави и книга „Мисија Македонија“, во студиото на „Офанзива“.
Тој нагласи дека македонскиот премиер Христијан Мицкоски цитирал пасуси од нацрт-извештајот дури и пред да биде усвоен, што јасно покажувало, според него, дека имало протекување на интерни информации.
Според Јорданов, авторот на извештајот – европратеникот Томас Вајц од групата на Зелените – дејствувал во тесна координација со македонските власти. Текстот содржел контроверзна формулација за „многувековен македонски идентитет и јазик“, што Јорданов го опиша како груба замена на историската вистина.
„Овој извештај не чини – има речиси 300 предлози за измени во него. Ова значи дека е погрешен“, коментираше Јорданов, објаснувајќи дека Вајц ја заобиколил вообичаената практика на изготвување компромисни текстови меѓу политичките групи во Европскиот парламент.