Пензиите во Македонија вредат повеќе од шест европски земји, вклучувајќи и една членка на Европската унија, покажуваат споредбените податоци на компанијата за плати и човечки ресурси Moorepay.
Со покриеност од 64 проценти на трошоците за живот со една пензија, Македонија го дели 32. место со Турција меѓу 39 европски држави опфатени со истражувањето.
Полошо од македонските пензионери во овој поглед стојат тие од Кипар и од Босна и Херцеговина, кадешто една пензија е доволна за подмирување на 53 отсто од животните трошоци, како и Молдавија (42 отсто), Украина и Албанија (по 29 отсто) и Грузија (22 отсто).
Од земјите во регионот се издвојува Грција со 103 проценти покриеност на трошоците за живот со една пензија, а по неа следуваат Словенија со 95 отсто, Црна Гора со 89 отсто, Хрватска со 82 отсто, Бугарија со 78 отсто и Србија со 68 отсто.
На европскиот врв е Луксембург, кадешто со една пензија се покриваат 225 проценти од трошоците за живот, втора е Италија со 210 отсто, а трета Финска со 208 отсто.
Од 39 земји, само во 19 животните трошоци можат да се покријат со една пензија.