Министерката за образование и наука, Весна Јаневска, изјави дека постои можност за зголемување на сумата за студентски оброк поради инфлацијата, но тоа би се реализирало следната година.
„Искрено се надевам дека постои таква можност. Се разбира, треба да се направи нивелација на студентскиот оброк со инфлацијата, но зборуваме за следната година. За оваа година, тие побараа проширување на квотата, кое го направивме. Досега за сè што побараа, сме им излегле во пресрет и јас им благодарам, бидејќи тоа го признаваат и го промовираат“, рече Јаневска.
Таа додаде дека реализацијата на оваа мерка зависи од буџетот, но нагласи дека ќе продолжи да ги поддржува оправданите барања на студентите.
„Зависи од состојбата на буџетот, но кога сметам дека барањата се оправдани, ќе ги застапувам додека сум министер“, истакна Јаневска.
Денес во Скопје, заедно со претставници на Универзитетот „Гоце Делчев“-Штип, министерката го промовираше прирачникот за вештачка интелигенција во образованието.