Натаму Климент посочи: Катедралниот храм на охридските и македонски архиепископи — „Света Софија“, кој всушност претставува средиште и срцевина на нашата света Македонска Православна Црква, токму под овие небоземни сводови на Божјата Премудрост се испишувала историјата на нашата древна Охридска Архиепископија. Истокот ја благословил, а Западот ја потврдил себежртвената и безрезервна рамноапостолска мисија на светите браќа Кирил и Методиј. Таа и во Охрид е посведочена преку крштението, низ кое се ословесивме, и преку азбуката, низ која се ограмотивме, не само ние, туку и мноштво братски народи со кои имаме единство во православната вера. Радоста што произлегува од животот во заедница со Бога и со другиот човек за нас претставува вредносен систем. Тој е воспоставен најнапред од апостолското Павлово наследство, а потоа продолжен во Кирилометодиевата свештена традиција, која од времето на светите Климент и Наум ревносно се негува во Македонија – рече во своето истапување Климент.
Наша должност и обврска е овој завет со дела да им го посведочиме и предадеме на младите поколенија, кои се нашата иднина и наследство. Нека ни е честит празникот, а светите Кирил и Методиј нека бидат постојано со нас, заедно со нивните свети ученици, та од род во род, и од генерација во генерација да се продолжува и да се сведочи нивното дело, нагласи Климент на денешното чествување во Охрид.