На прашањето дали Владата се одлучила кој да биде нов шеф на Јавното обвинителство, премиерот Христијан Мицкоски во интервју за Канал 5 синоќа рече дека Ленче Ристоска апсолутно не е во игра за нов државен јавен обвинител.
Премиерот рече дека Владата сè уште го нема добиено записникот од Советот на јавни обвинители и дека ќе се произнесе откако ќе го добие.
„Да зборуваме врз основа на документи и на факти, сепак сум претседател на влада не можам да изнесувам свои лични ставови. Да ги добиеме записниците и тогаш ќе се произнесеме“, рече Мицкоски.
На прашање дали сите четворица кандидати, вклучително и обвинителката Ленче Ристоска, која своевремено беше дел од згаснатото Специјално јавно обвинителство (СЈО) Мицкоски со одговор:
„Апсолутно не се сите во игра. Мојот став поврзан со тоа име е апсолутно дека тоа име не е во игра. Па еве, искатализиравме барем некаков одговор, од четворица, тројца се во игра“ изјаво премиерот.
Советот на јавните обвинители даде позитивно мислење за четворица од петте кандидати за државен јавен обвинител. Позитивно мислење добија сегашната в.д. државна јавна обвинителка Анита Тополова-Исајловска, обвинителката Ленче Ристовска, судијата од Кривичниот суд, Ненад Савевски, и обвинителката од скопското Обвинителство, Лидија Раичевиќ.
За кандидатурата на Владимир Панчевски едногласно одлучи дека тој не ги исполнува условите предвидени со законот во однос на работниот стаж.