Македонците во Австралија почнуваат правна војна со градските власти на Мелбурн околу употребата на знамиња со ,,Сонцето од Кутлеш”.
Војната почнува откако градот Мелбурн забранил знамето со ,,Сонцето од Кутлеш” да биде користено за време на локален фестивал.
Според Советот на Македонските заедници на Австралија се работи за расистичка одлука против Македонците.
Во писмо до Комитетот за фестивалот Мумба на градот Мелбурн се упатува жалба за нивната ,,необјаснива и расистичка одлука да им забранат на групите од Македонската заедница кои учествуваат на фестивалот Мумба да го прикажуваат нашиот најзначаен национален симбол, нашето 16-крако Македонско Сонце од Кутлеш”
Во жалбата се додава дека со овој симбол, кое некои групи го нарекуваат и Ѕвезда од Вергина, Македонците парадирале повеќе од 30 години без никакви проблеми.
,,За жал, градот Мелбурн одлучи да ги игнорира нашите барања за поништување на оваа неправедна и дискриминаторска одлука користејќи слаб изговор за „културна чувствителност околу некои културни или регионални дизајни на знамиња“.
Ова е расистички и дискриминаторски чин за задоволување на каприците на една злобна и незнаечка група која продолжува да го негира самото постоење на Македонската етничка припадност, јазик, историја и култура, чии мислења се далеку од основните начела на мултикултурализмот на самоидентификација, меѓусебно почитување и толеранција”, се вели во писмото.
Според Советот на македонските заедници вк Австралија мултикултурализмот во Австралија треба да биде за сите групи на заедницата да уживаат и да го споделуваат, а не само за неколкумина избрани.
,,На австралиските Македонци им е доста од оваа нетрпеливост и предрасуди и ние ќе бараме правна заштита за оваа неправда”, стои во писмото кое е потпишано од Крис Ангелков претседавач со Советот на македонските заедници во Австралија.