Членовите на Европскиот парламент од Бугарија го вклучија алармот во својата земја за активното лобирање на Македонија против т.н. Француски предлог што предвидува впишување на Бугарите во македонскиот устав како услов за почеток на преговори за членство во Европската унија.
Посебно „притеснени“ биле бугарските европратеници од тоа што во годинашниот нацрт-извештај за напредокот на Македонија главниот известувач Томас Вајц инсистира ЕП да побара толкување од Советот на ЕУ за правниот статус на вториот протокол кон Договорот за добрососедство меѓу Бугарија и Македонија.
Европратеникот Станислав Стојанов укажува дека шефот на македонската дипломатија Тимчо Муцунски бил особено активен во последните денови.
„Можам да кажам дека тој искина еден чифт чевли од средбите со кој и да е во Европскиот парламент, а заклучокот дефинитивно е дека сака да ги отфрли договорите од 2022 година, т.н. Француски компромис, и да постави сосема нови услови и сосема нова преговарачка рамка“, се пожали Стојанов пред Бугарската национална телевизија (БНТ).
„Тука земја-кандидат се обидува да наруши, да заобиколи, како што рече нивната претседателка, да најде ‘креативен пристап’ за решавање на проблемите, а тие одбиваат да го спроведат она за што се согласиле, обидувајќи се да го заобиколат“, додава европарламентарецот Ивајло Валчев.
„Единствената тема им е од нив таканаречената билатерализација и не само поради тоа не можеле да продолжат напред. Такво нешто не постои“, нагласува европратеникот Андреј Ковачев.
Бугарските европратеници стравуваат и дека земјите што претходно го поддржуваа компромисот почнуваат да ги менуваат своите ставови, а земјите од поранешна Југославија биле особено активни во корист на Македонија.