„Архитектот со светска слава од Мексико Мишел Ројкинд ќе биде дел од тимот на кандидатот за градоначалник на Чаир Бујар Османи, со цел да помогне во изготвувањето нова визија за иднината на оваа општина.“ – објави ТВ Шења.
Натаму телевизијата изнесува: Веста ја објави Османи преку својот фејсбук- профил, истакнувајќи дека целта на соработката со Ројкинд е да се создаде град попристапен за живеење, сеопфатен, и насочен кон иднината, со посебна нагласка на јавните простори, кои ги поттикнуваат заедницата, културата и можностите.
Ројкинд е основач на добро познатото студио „Ројкинд Архитектос“, кое е избрано од списанието ‘Форбс’ како една од 10-те најиновативни нови фирми во светот. Тој е широко познат по иконичките проекти како што се „Музејот на чоколадо Нестле“ “ (Nestlé Chocolate Museum”( (2007), „Национална кинотека XXI век“ (Cineteca Nacional Siglo XXI”,, „Ромски пазар“ (Mercado Roma“), како и по спектакуларните фасади на „Ливерпул Интерломас“.
Во 2010 година Ројкинд ја освои престижната награда „Нови гласови“ од Архитектонската лига на Њујорк, а меѓународните медиуми како што е „Њујорк тајмс“ го вклучија во нивната листа на „личностите, кои треба да се следат“. Тој држел предавања на конференции како што се TEDx и Светскиот фестивал на архитектура, бил гостин-професор на престижни универзитети како што се Харвард, Универзитетот во Пенсилванија, SCI-Arc и Универзитетот Алто.
Според Османи, посветеноста на Мишел Ројкинд е гаранција за смела и одржлива трансформација на Чаир: „Поради докажаната историја во претворањето на амбициозните идеи во реалност, ангажирањето на Ројкинд ќе гарантира дека визијата на Чаир во утрешнината ќе биде смела, веродостојна и трансформативна“. – објави ТВ Шења.