Премиерот Христијан Мицкоски реши да закаже меѓупартиска лидерска средба на која би се разговарало за укинувањето на таканаречената „Пржинска влада“ воведена пред десет години, но и за другите прашања, пишува во неделата електронското издание на весникот „Вечер“.
Од Владата денеска за весникот Вечер изјавиле дека почнало испраќање на поканите до политичките партии. „Ве информираме дека поканата за лидерска средба е во процес на испраќање и ќе биде доставена до сите политички партии кои имаат парламентарна група во Собранието“, го цитира весникот одговорот од владината служба за односи со јавноста.
„Техничката влада мора да остане затоа што таа е последната линија на одбрана од целосно заробување и злоупотреба на најважното, а тоа е слободната волја на граѓаните за време на изборниот процес. Таа може да се укине само тогаш кога ние би биле зрело општество, а ние тоа сега во овој момент не сме.“ – рече Филипче.
Од ДУИ соопштија дека откако официјално ќе ја добијат поканата ќе го кажат својот став за присуството на средбата. Опозициската Левица вчера соопшти дека се залага за укинување на техничката влада, но нејзиното укинување би било прифатливо само ако е проследено, како пто наведуваат, „со вистински, а не декларативни демократски реформи и воведување на една изборна единица“.