Митрополитот преспанско-пелагониски, Петар, и епископот велички, Никола, учествуваа на вчерашната литургија начаствувана од рускиот патријарх Кирил во руската престолнина Москва. Службата, која е прва во која учествуваат македонски достоинственици откако РПЦ во 2022 година ја призна автокефалноста на МПЦ-ОА, се одржа во манастирот „Свети Сергеј Радоњишки“, на Сергеов посед, близу Москва. На литургијата учествувал и митрополит волоколамски, Антониј, кој е директор на Одделот за меѓународни односи на Руската православна црква и викар на патријархот Кирил. Во импресивниот храм на Руската православна црква, кој бил основан во 1337 година и се наоѓа на 70 километри североисточно од Москва, присуствуваа бројни верници и црковни достоинственици на РПЦ.
Со службата началствуваше рускиот патријарх Кирил, а во еден литургиски дел учествуваа и двајцата македонски достоинственици кои се обратија на македонски јазик.
–Теби прилега секоја чест и поклонение на Отецот и Синот и Светиот Дух, сега и секогаш и во век и веков… – изговараше владиката Петар како дел од својата служба.
И епископот велични, Никола, изговори дел од молитвата.
– Благодатта на еднородениот твој син со кого си благословен со пресветиот благ и животворен твој дух, сега и секогаш и во вечни векови – зборуваше тој на македонски јазик.
Во МПЦ-ОА вчера ни изјавија дека станува збор за посета до која дојде откако двајцата достоинственици добиле покани од Руската православна црква.
–Тие се поканети на службата и за тоа патување е известен архиепископот г. г. Стефан. Станува збор за посети и за учество на богослужби кои се вообичаени меѓу црковните достоинственици. Епископот струмички, Наум, деновиве е во посета на Романската православна црква каде сослужува со тамошните достоинственици, а владиката делчевско-каменички, Марко, беше во посета на Франција – ни објаснија црковните извори.
РПЦ ја призна автокефалноста на МПЦ-ОА во 2002 година врз основа на томосот издаден од Српската православна црква. Во 2023 година во Македонија престојуваше рускиот митрополит волоколамски, Антониј.