„Ги отвораме вратите за домашните компании да ги пласираат своите производи во големите европски синџири. Продолжуваме да разговараме и привлекуваме реномирани светски компании кои веруваат во потенцијалот на нашата држава!“ – напиша Мицкоски на фејсбук.
Премиерот Мицкоски од денеска престојува во повеќедневна посета на Германија, каде што учествува на 62. Минхенска безбедносна конференција, на која, како што соопшти владината прес-служба, ќе ја реафирмира определбата на државата за предвидлив и фер процес на интеграција во Европската Унија, без дополнителни билатерални условувања. Мицкоски е придружуван од министрите за одбрана Владо Мисајловски, за надворешна политика и надворешна трговија, Тимчо Муцунски, и за внатрешни работи, Панче Тошковски.
Во рамките на конференцијата шефот на македонската влада ќе оствари повеќе средби со европски лидери, високи претставници и раководители на меѓународни безбедносни институции. Разговорите, како што информираат од Владата, ќе бидат насочени на регионалната геополитичка стабилност и улогата на Република Македонија како чинител на стабилност на Западниот Балкан и како активен член на НАТО. Во заднината на Минхенската безбедносна конференција се планирани и средби со високи претставници на Европската Унија, како и со шефови на држави и влади, најави владината прес-служба.