По трагичното убиство на Климе Митревски во Охрид, кое предизвика силни реакции во јавноста, се огласи Божидар Грозданоски, син на осомничениот Жарко Грозданоски. Тој упати јавна поддршка за својот татко преку објава на социјалните мрежи.
Во својата порака, Божидар Грозданоски реагира на, како што вели, несоодветниот однос кон неговото семејство во јавноста и медиумите.
„Во овие исклучително тешки моменти за моето семејство, чувствувам потреба јавно да изразам целосна поддршка за мојот татко, кој со години совесно, чесно и пожртвувано ја извршува својата лекарска професија. За жал, наместо разбирање и достоинство, сведоци сме на медиумски линч кој е најмалку потребен токму сега, кога поминуваме низ сериозна и чувствителна ситуација. Притоа, неправедно се занемаруваат стотиците луѓе на кои им помогнал, грижата што им ја пружил и животите кои ги спасил“, напиша тој.
Божидар Грозданоски истакнува дека јавноста, според него, има сосема поинаква перцепција за неговиот татко.
„Брвенчани, тетовчани, но и граѓаните низ цела Македонија многу добро знаат кој е Жарко – не само како доктор, туку и како човек“, наведува тој.