Премиерот Христијан Мицкоски вели дека на самитот во Тиват разговарал со францускиот претседател и германскиот канцелар за можностите да се даде поттик за европскиот пат на земјите од Западен Балкан преку механизми како Реформската агенда или Планот за раст.
Мицкоски во гостување на Националниот сервис по повод 2 години Влада, во рече дека не очекува да се промени рамката за евроинтегративниот пат за Македонија, но дека двете највлијателни земји во Европа, Франција и Германија, дале предлог кој може да го забрза интегрирањето.
„ Јас тоа го разговарав и со канцеларот Мерц и со претседателот Макрон, јасно дефинирајќи што мислиме дека можеби да се додаде или одземе од тој нивен предлог, гледано од нашата оптика“, рече премиерот и објасни:
„ Затоа што ако нивниот предлог е врзан со затворање кластери, ако имате Косово кое што не е ни кандидат, Босна и Херцеговина, Македонија која што почнала, а не почнала, ја имате Србија која што нема усогласена надворешна и одбранбена политика со Европската Унија и има некаква премолчена блокада и не може да отвара и да затвора кластери, тогаш не ја гледам целисходноста. Можеби е доволно да се најде некој друг механизам како Реформската агенда или Планот за раст, па на тој начин, практично да се дадат поттици и поддршка на земјите од Западен Балкан.
Тоа беше мојот предлог што го дадов на тие билатерални средби и мислам дека предизвикав внимание. Ќе видиме сега дали тоа ќе биде операционализирано, но во секој случај, јас сум задоволен од тоа што се води сметка, односно се бараат конструктивни решенија во рамките на возможното на регионот да му се понуди европска перспектива, и тоа е добро“, рече Мицкоски.
Според неофицијалниот документ претставен од Франција и од Германија од самитот кој се одржа на почетокот на јуни, исполнувањето на одредени критериуми за прием ќе биде наградено со привилегиран пристап до заедничкиот европски пазар и можноат да се испратат набљудувачи во европските институции.