Вчера, во пресрет на денешниот Ден на македонската независност, претседателката Гордана Сиљановска-Давкова, заедно со министерката за образование и наука Весна Јаневска се сретна со талентираните ученици од основните и средните училишта кои во изминатата учебна година учествуваа на меѓународни научни олимпијади и натпревари, а дел од нив се закитија со медали, високи награди и признанија.
Ученици од Сојузот на математичарите на Македонија, Сојузот на хемичарите и технолозите на Македонија, Македонското географско друштво, Здружението на информатичарите на Македонија, Друштвото на физичари на Македонија, Македонското биолошко друштво, Филозофско друштво на Македонија, Здружение на средни училишта ТЕРА ФИТОН АНИМАЛ – Свети Николе, Здружение на музичко-балетски педагози, Здружение на наставници по германски јазик и ученици кои индивидуално учествувале на меѓународни натпревари, во друштво на своите ментори, ја исполнија салата Мозаик со младешка енергија, ум и знаење.
Опколена со десетици ученици, претседателката искажа задоволство од нивното присуство и гордост што земјава има компетитивни умни млади во толкав број и со толку златни, сребрени и бронзени медали во математика, физика, хемија, информатика… Говорејќи за новите технологии и за вештачката интелигенција, таа укажа и на опасностите, покрај предностите, како и на важноста на емоционалната интелигенција на човекот.
За неа, нема подобар ден за оддавање признание и изразување благодарност за нивните успешни натпревари, како сигурен доказ дека во науката, образованието и културата Давид може да го победи Голијат! Им посака уште многу награди, но и водечки позиции во земјава еден ден, како предуслов за општествен прогрес.
Поздравувајќи го успехот на учениците, министерката за образование и наука, Весна Јаневска истакна дека секој има право на образование, но дека таа и владата ќе продолжат да ги поддржуваат најдобрите ученици и студенти, ослободувајќи ги од грижите врзани за патот и сместувањето и овозможувајќи им да се посветат на натпреварите, наместо да се оптеретуваат со финансиски проблеми.
Таа ги повика учениците да не ја забораваат татковината, чија иднина зависи од нив.
Претседателката Сиљановска-Давкова и министерката Јаневска изразија желба догодина повторно да се сретнат со уште поголем број ученици, добитници на признанија за постигнатите успеси во натпреварите ширум светот!
