Владата на Република Македонија донесе одлука за набавка на 100 нови амбулантни возила со надградена медицинска опрема за јавните здравствени установи низ целата држава. Вкупната вредност на инвестицијата изнесува 461.250.000 денари, а во моментов е во тек законскиот рок за поднесување понуди.
Министерот за здравство, Азир Алиу, изјави дека оваа набавка значително ќе го зајакне капацитетот на здравствениот систем за одговор при итни состојби.
„Набавката на 100 нови амбулантни возила значително ќе го унапреди капацитетот на здравствениот систем за одговор при итни состојби и ќе овозможи побрза и поефикасна интервенција со брз и навремен транспорт на пациенти до соодветните здравствени установи. Возилата ќе бидат опремени со надградена медицинска опрема, а со распределбата низ државата ќе се обезбеди подобра покриеност, особено во руралните средини“, рече министерот Алиу.
Оваа инвестиција е дел од поширок процес на модернизација и суштинско јакнење на системот за здравствен одговор во кризни состојби, преку подобрување на итната медицинска помош и зголемување на оперативната способност на целиот здравствен систем.