По неколкудневниот прекин, апликацијата МојДДВ повторно е ставена во функција, но корисниците и натаму се соочуваат со повремени проблеми при користењето. Според информации од граѓани, повторно е можно најавување во системот и пристап до апликацијата, но при скенирање на фискалните сметки сѐ уште се јавуваат прекини и повремени грешки во работата.
Во изминатите денови, при обид за пристап до апликацијата, корисниците добиваа порака „Нема конекција до УЈП“, поради што не можеа да ги евидентираат фискалните сметки за поврат на ДДВ. Засега нема официјално соопштение од Управата за јавни приходи за причините за повеќедневниот прекин, ниту за тоа кога системот целосно ќе се стабилизира.
Со сканирање фискални сметки граѓаните имаат право на поврат до 2.100 денари за тримесечен период. Јуни е последниот месец од тримесечјето кога УЈП треба да ја изврши уплатата на повратот. Од УЈП во март, на крајот на претходното тромесечје кога доцнеше исплатата, кажаа дека согласно законските одредби, рокот за поврат на ДДВ изнесува 60 дена по завршувањето на кварталот.