Градоначалникот на Град Скопје, Орце Ѓорѓиевски, изјави дека не е планирано зголемување на цените за паркирање во главниот град, нагласувајќи дека фокусот на градските власти е воспоставување ред и еднаков третман за сите граѓани. На прес-конференција, Ѓорѓиевски одговори на новинарско прашање поврзано со цените на паркингот и повластените услови за одредени институции и вработени.
- Има институции што плаќаат по повластени цени за паркинг, меѓу кои и вработени во Град Скопје, тоа нема да продолжи. Таква работа нема да има. Вработените овде земаат плата и тие се исти како сите останати граѓани во Скопје. Ќе си плаќаат колку што е утврдено – истакна Ѓорѓиевски.
Тој посочи дека е недозволиво дел од корисниците да плаќаат значително пониски суми за месечна карта, додека останатите граѓани плаќаат повисока цена.
- Не може некој да плаќа 400 денари, а друг 1.400 денари за месечна карта. Секој ќе си плаќа ист износ. Тука толеранција нема да има. Но, тоа не значи зголемување на цените, туку воспоставување ред – нагласи градоначалникот.
Ѓорѓиевски најави и дека во план е воведување зонско паркирање на повеќе локации низ градот, со цел подобра организација на сообраќајот и поефикасно користење на паркинг-просторот.
Клучни промени во паркирањето:
- Укинување на привилегиите: Вработените во Градот повеќе нема да плаќаат повластени суми од 400 денари за месечен билет. Отсега, за нив ќе важат истите цени како и за сите останати граѓани (1.400 денари).
- Замрзнати цени: И покрај економските предизвици, градоначалникот потврди дека цената на паркингот за граѓаните нема да се зголемува.
- Проширување на зоните: Зонското паркирање ќе се воведе на нови локации низ Скопје, со цел да се стави крај на сообраќајниот хаос и самоволното паркирање на тротоари и зелени површини.
- Ред и контрола: Најавена е засилена контрола за да се овозможи полесен пристап до паркинг места за жителите во нивните сопствени маала.