Со 62 гласа „против“, 21 „за“ и ниту еден „воздржан“, Собранието вечерва го отфрли барањето за интерпелација за работата на министерот за земјоделство, шумарство и водостопанство Цветан Трипуновски, поднесена од пратеници од СДСМ и од „европскиот фронт“ на ДУИ.
Опозицијата бараше оставка од министерот поради „катастрофалните резултати, намалените субвенции, неисполнетите ветувања, падот на откупните цени, блокираните европски средства, коруптивните скандали и огромното незадоволство кај земјоделците“.
Владејачкото мнозинство, пак, барањето го оцени како беспредметно, неосновано, неиздржано и како обид за дефокусирање на јавноста од вистинската одговорност за „пустошот, долговите и девастацијата што во земјоделството ги остави претходната власт на СДСМ, предводена од поранешниот министер Љупчо Николовски“.
Самиот Трипуновски уште пред два месеца му порача на Николовски: „Интерпелацијата ти е беззначајна како запленетите 30 килограми путер“.