Вицепремиерот и министер за транспорт и врски, Александар Николоски, денеска изјави дека изградбата на автопатот Скопје–Блаце претставува значаен чекор кон остварување на стратешката цел Македонија да стане важна сообраќајна крстосница на Балканот.
На церемонијата на потпишување на Договорот за инвестициски грант меѓу Јавното претпријатие за државни патишта и Европската банка за обнова и развој (ЕБОР), Николоски посочи дека за проектот се обезбедени грант-средства во износ од 30,8 милиони евра преку Инвестициската рамка за Западен Балкан (WBIF).
Според него, автопатот е дел од трансевропската рута 6, која ќе ги поврзе Скопје и Приштина, а понатаму ќе продолжи кон Тирана, Драч и Бар, со што ќе се создадат нови можности за трговија, стопанство и туризам.
„Без разлика што немаме излез на море, на овој начин државата може да стане стратешки најважна точка на Балканот, преку која ќе се вкрстуваат бизнисот, трговијата, туризмот и економската размена“, изјави Николоски.
Тој нагласи дека проектот е дел од визијата Македонија да го искористи своето географско значење, како земја низ која минуваат повеќе паневропски транспортни коридори.
Николоски информираше дека предвидениот рок за изградба е четири години, но изрази очекување работите да завршат и пред истекот на рокот. Изведувач на проектот е домашната градежна компанија „Гранит“, што според него е потврда дека македонските компании имаат капацитет за реализација на големи инфраструктурни проекти.
Автопатот Скопје–Блаце ќе биде долг 10,5 километри, а на трасата ќе бидат изградени околу четириесет објекти.