Автопатот Скопје–Блаце е значаен инфраструктурен проект кој треба да го зајакне транспортното и економско поврзување на Македонија и регионот, истакна денеска заменик пртеседателот на Владата и министер за транспорт, Александар Николоски, на поставување на камен темелник за изградба на автопатот Скопје-Блаце.
Тој потенцира дека проектот ќе донесе развој и посилно регионално поврзување, отворајќи нови можности за пристап до пристаништата Драч и Бар и дополнително зацврстувајќи ја позицијата на Македонија како транспортна раскрсница на Балканот.
- “Навистина е убаво кога се почнуваат нови проекти и кога се гледа нешто што во следните неколку години ќе донесе дополнителен развој, едно силно поврзување на нашата држава со Косово и со Црна Гора, отворање кон најмалку две пристаништа – дополнително отворање кон пристаништето Драч и отворање кон пристаништето Бар – и уште повеќе зацврстување на Македонија како една раскрсница на Балканот. Кога оваа Влада беше формирана во 2024-тата година, јасната политика и визија на премиерот Мицкоски беше дека Македонија треба да стане раскрсница на Балканот, да ја искористиме нашата уникатна положба каде што два паневропски коридори – Коридорот 8 и Коридорот 10 – се пресекуваат, а на нив се надоврзуваат и Коридорот 11 и Коридорот 6”, истакна вицепремиерот Николоски.
Премиерот на Косово, Албин Курти, денес беше присутен на камен-темелникот на изградбата на автопатот Скопје – Блаце од 10,5 километри кој што ќе ја поврзе земјата со соседот.
Со поставување камен-темелник денеска официјално започна изградбата на втората фаза од автопатот Скопје-Блаце во должина од 10,5 километри. Проектот вреден над 198 милиони евра го гради домашната компанија „Гранит“, а треба да донесе подобра сообраќајна поврзаност со Косово и излез до пристаништата во Драч и Бар. Курти е во официјална посета на Скопје, а неговата агенда започна со овој настан.
