Поради здравствени причини на еден од осомничените во случајот „Геријатрија“, отповикани се двете главни судски расправи од кои едната требаше да се одржи денеска, а другата на 18 септември, информираат од Основниот кривичен суд Скопје.
Одбраната на обвинетиот Блерим Амити, кој се гони за примање награда за противзаконито влијание, доставила до судот медицинска документација оти Амити не може да присуствува на расправите.
Судењето, како што велат од Кривичен, ќе продолжи на следниот утврден термин на 20 октомври.
Во случајот „Геријатрија“ обвинет е и Мухсин Арифи, директор на ЈЗУ Специјализирана болница за геријатриска и палијативна медицина „13 Ноември“-Скопје кој се гони за примање поткуп.
Според обвинителниот акт, Арифи побарал имотна корист од 20 000 евра за да овозможи болнички прием на пациентка во тешка здравствена состојба. Амити, кој претходно го познавал сведокот, се понудил да посредува и ја примил паричната сума, при што бил фатен на самото место од страна на полицијата.
На минатото рочиште обвинетите се изјаснија дека не чувствуваат вина за делата што им се ставаат на товар.
Според обвинителката Искра Хаџи Василева, случајот е пример за длабоко вкоренета корупција во општеството.
Хаџи Василева вели дека станува збор за директно, грубо барање мито од страна на директорот – износ кој бил предмет на преговори, а на крајот бил прифатен како минимален за да се изврши службено дејствие што инаку морало да се изврши без надомест.
Одбраната на обвинетите најави дека во текот на кривичната постапка ќе презентира докази во вид на статут, процедури и законски преку кои ќе бидат отворени неколку правни прашања со цел да се докаже дека Арифи, како и Амити, не можеле, односно немале намера да извршат какво било кривично дело.
Основното јавно обвинителство за гонење организиран криминал и корупција (ОЈО ГОКК) обвинителниот акт го поднесе на 4 јули годинава.