Чавков ја отслужуваше затворската казна во затворот во Штип. Беше осуден на 18 години затвор за наводен „тероризам“ по настаните на 27 април 2017 во македонското Собрание.
Денеска Чавков напиша на фејсбук:
ПРАВНА ПОТВРДА – ПАТ КОН ДОВЕРБА
Недовербата во правосудството одамна не е перцепција, РЕАЛНОСТ е.
Сомневања за селективност, притисоци, различни исходи за исти случаи, застарувања со измени на закон, сето тоа го отвара суштинското прашање: дали секој во државата имал фер и независно судење? Затоа е потребен јасен и доверлив процес за правна потврда на најспорните постапки. НЕ РЕВИЗИЈА на пресуди, туку проверка дали постапките биле ФЕР, НЕПРИСТРАСНИ и ослободени од влијанија.
Не “судење” на правосудството во целина туку утврдување дали системот во одредени случаи дозволил СЕЛЕКТИВНА ПРАВДА. Тоа не значи дека ако се утврдат злоупотреби или попречување на правдата, не треба проверка согласно со закон во доверливи постапки.
Оваа не е прашање на минатото. Оваа е прашање на иднината: – како да се врати довербата; – како да се воспостават еднакви стандарди; – како да се спречат вакви сомневања повторно да се појават.
Затоа е потребен транспарентен процес, воден од домашни институции со вклучување независни експерти со европско искуство како гаранција за непристрасност. Владеењето на правото се брани со подготвеност да се провери, кога постои сомнеж. Прашањето е дали тоа важи за сите, или не? – истакна Митко Чавков преку општествената мрежа.