Пратеничката од СДСМ, Славјанка Петровска, во интервју за Радио Слободна Европа истакнува дека партијата не смее да го игнорира ниту да го заборави историскиот пораз на локалните избори, каде освои само 126.000 гласови и шест општини. На прашањето за лидерството на Венко Филипче, таа одговара дека опстанокот на СДСМ не зависи од една личност, туку од колективната способност да се врати на победничкиот пат.
Според неа, причините за дебаклот се многубројни и бараат часови за детално објаснување, но клучно е неодговореното прашање зошто партијата доживеа пораз на парламентарните избори минатата година, како и на локалните во 2021, па дури и на парламентарните во 2020, кои иако донесоа влада, не беа задоволителни. Отсуството на вистинска внатрешна дебата за претходните резултати, во комбинација со општите прилики во државата, дополнително придонесе за овој исход.
Петровска нагласува дека вистинските анализи мора да бидат пишани и усвоени од партиските тела, а не само формални. За жал, ланскиот Конгрес беше одложен без епилог и без дискусија, иако извештај беше поднесен – таков пристап не смее да се повтори.
До декемврискиот Конгрес, актуелниот претседател има сериозен предизвик: да организира анализи и дискусии меѓу пратениците, градоначалниците, кандидатите и раководството, а потоа да понуди јасна платформа за излез од кризата. СДСМ, како партија од осамостојувањето, има огромни заслуги за државата и е неопходна – дури и во опозиција – за да се спречат повторувања на авторитарни сценарија од минатото. Опозицијата е клучна за граѓаните и демократијата, особено во вакво опкружување.
Целото интервју на Славјанка Петровска можете да го погледнете на следниот линк