Поранешната економска директорка на Клиниката за токсикологија, Бесија Илјази, со судска одлука треба да врати 659.831 денари, сума што клиниката ја исплатила како хонорари за спорни ангажмани. Одлуката е донесена во граѓанска постапка по тужба на клиниката, со која се бараше надомест на материјална и нематеријална штета. Но судот, според информациите што ги објавија медиумите, ја уважил тужбата во делот на материјалната штета – односно враќање на исплатените пари за хонорари.
Иљази беше осудена со признание на вина за „злоупотреба на службена положба и овластување“ на условна осуда со заштитен надзор на казна затвор од 2 години која нема да се изврши ако во рок од 4 години не стори ново кривично дело. Таа ги пречекорила своите службени овластувања со намера да овозможи противправна имотна корист за 17 лица.
Новиот директор на Клиниката за токсикологија, професор доктор Андон Чибишев, откако беше разрешена Иљази им соопшти на 18-те ангажирани со договор на дело од болницата кои со месеци незаконски одеа на работа – повеќе да не доаѓаат, со исклучок на биологот, бидејќи беше потребен за опстојување на токсиколошката лабораторија.