Претседателот на Владата, Христијан Мицкоски, упати официјална честитка по повод 23 мај – Меѓународниот ден на Власите, изразувајќи им искрени желби за мир, здравје, благосостојба и спокој во нивните домови.
Во своето празнично обраќање, премиерот Мицкоски посебно го истакна историскиот придонес и културното богатство на влашката заедница во развојот на нашата земја.
Тој нагласи дека влашката култура, традиција и обичаи претставуваат силен и препознатлив белег во севкупниот општествен и економски напредок на Македонија.
Премиерот повика на заеднички ангажман на сите граѓани за унапредување на општествените вредности и економскиот просперитет.
„Единството, толеранцијата и меѓусебното разбирање се вредности со кои мора сите заеднички да се стремиме и да ги негуваме, затоа што само така ќе изградиме општество кое ќе се темели на меѓусебна почит и доверба“, порача Мицкоски.
Како клучна цел на Владата, тој го посочи создавањето на подобри услови за живот кои ќе ги задржат младите генерации во татковината.
„Заеднички да работиме за просперитет и раст на Македонија, за сегашните и идните генерации да имаат услови да ја градат сопствената иднина тука, во својата татковина. Нека Ви е честит Националниот ден на Власите“, се вели во честитката на премиерот Мицкоски.