Учесниците на 64-тите Струшки вечери на поезијата вчеравечер, на 22 август 2025 година, имаа можност да присуствуваат на поетско читање на поетите од потесниот избор за наградата „Браќа Миладиновци“ за 2025 година и да испијат поетско кафе со добитникот на „Златен Венец“ за 2025 година, словачкиот поет Иван Штрпка.
Ги проследија и поетските портрети на Катица Ќулавкова, минатогодишната добитничка на наградата „Браќа Миладиновци“ за најдобра поетска книга меѓу два фестивала, објавена на македонски јазик, и на Матеуш Шимчик од Полска, добитникот на наградата „Мостови на Струга“ за 2025 година за најдобра дебитантска книга од млад автор
Пред присутните беше претставена и тематската антологија „Дионис и Свети Трифун“, чиј приредувач е истакнатиот македонски поет и есеист Славе Ѓорѓо Димоски. Според приредувачот, оваа тематска како панорама на македонската винска поезија е прво видување на оваа тема во македонската литература воопшто. „Книгата е составена од два клучни дела и еден вовед. Воведниот дел се две песни: едната е од Јордан Хаџи Константинов – Џинот, во која се опева дионизискиот ритуал, а другата е од Матеја Матевски, посветена на Свети Трифун. Тие две песни се двата мотива, што го прават јадрото, од кое се развива книгата. Во првиот дел се песни од преродбата до кодификацијата на македонскиот јазик, а вториот е од кодификацијата на македонскиот јазик, односно од 1945 година па наваму.“ – рече Димоски.
Иако замислата му била да направи антологија на македонската боемска поезија, по неколкумесечни истражувања заклучил дека нема таква класична боемска поезија, а имало значителен број песни посветени на лозата, лозјето, виното и задоволствата од пиењето вино, па затоа решил да ја именува како македонска винска поезија. Содржината е поделена на неколку поглавја, кои содржат своја тема.
Манифестацијата продолжи со поетски читања на поети од платформата Версополис, поетски портрети, со меѓународното поетско читање „Кругови“ и музичко-поетска изведба „Ноќ без интерпункција“. Вчеравечер беше врачена наградата „Млада Струга“ за 2025 година на поетот Андреј Анѓеловиќ.
Во рамките на програмата меѓудругото утре на прес-конференција ќе биде соопштен добитникот на наградата „Браќа Миладиновци“, а традиционално во црквата Света Софија во Охрид ќе има поетски портрет на добитникот на „Златен венец“за 2025 година Иван Штрпка од Словачка.