Судењето за случајот „Онкологија 2“ против поранешните директори на Клиниката за радиотерапија и онкологија Скопје, Нино Васев и Нехад Нухи, се очекува да продолжи денеска во Основниот кривичен суд во Скопје со сослушување на сведоци предложени од Обвинителството.
Обвинителството тврди дека тие наместо во интерес на клиниката и на онколошките пациенти, работеле во свој личен интерес и во интерес на приватни компании.
Обвинителката Ана Гоговска Јакимовска, во воведен говор на минатото рочиште рече дека поранешните медицински и економски директори на Клиниката за радиотерапија и онкологија, Васев и Нухи, не постапувале во интерес на јавната установа и на пациентите, туку во свој личен интерес и во интерес на приватни компании, и со своите дејствија ја злоупотребиле и поткопале довербата во здравствениот систем и јавниот интерес.
Васев и Нухи пред судот тврдат дека ќе докажат дека сите набавки на лекови ги правеле законски.
„Цел живот работам на клиниката за Онкологија и целта ми била да се спасат човечки животи. Економското вештачење е направено и потпишано од двајца медицински и економски директори на клиниката кои беа разрешени на мое барање“ рече Васев.
„Мојата невиност во случајот ќе произлезе од материјалните и вербалните докази кои ќе ги изведеме. Ќе се види какви пропусти направило Јавното обвинителство и зошто сите рокови во истрагата беа пробиени“ рече Нухи.