Тројца грчки државјани се приведени во Македонија пред 15 дена и ќе им се суди за поседување ловџиски патрони во нивните возила на граничниот премин Дојран.
Кај мажите на возраст од 38, 62 и 76 години беа пронајдени различни количини патрони во нивните автомобили за време на рутински преглед.
Тие се соочуваат со кривични обвиненија според член 396 од Кривичниот законик за нелегално поседување оружје и експлозиви.
На 38-годишникот од кукушкото село Муриес требаше да му се суди денеска, а на 62-годишникот од Кастануса, Сер, како и на 76-годишникот од кукушко Коромилија, в понеделник.
Тројцата влегле во Македонија одделно на 28 ноември, во различно време преку граничниот премин Дојран, каде што биле уапсени од страна на полициски и царински службеници, со присуство на екипа на ФРОНТЕКС, бидејќи во нивните автомобили биле пронајдени ловџиски патрони. Сите тројца се ловџии.
Според официјалното соопштение на македонската полиција, 38-годишникот бил уапсен прв во 10:20 часот наутро на 28 ноември, откако при преглед во неговото возило биле пронајдени 130 ловџиски патрони. Вториот маж, на возраст од 76 години, бил уапсен еден час подоцна откако во неговиот автомобил биле пронајдени 24 патрони. Третиот, на возраст од 62 години, бил уапсен во 16:30 часот бидејќи имал 40 патрони во своето возило.
Според истото соопштение, тројцата Грци се уапсени за сторено кривично дело по член 396 од Кривичниот законик, кое се однесува на нелегално производство, поседување и трговија со оружје и експлозиви – обвиненија кои се класифицирани како кривични дела, што го објаснува нивниот продолжен притвор.
„Тие се задржани во Битола и ќе бидат префрлени во Гевгелија за судење“, изјави за „Прототема“ претседателот на Ловечкото друштво на Кукуш, Хараламбос Василејадис.
Жителите на пограничните села Кукуш и Сер често доаѓаат во Македонија за да ги наполнат своите автомобили со поевтино гориво или да купат други производи по пониски цени отколку на грчкиот пазар.