Јован Деспотовски, долгогодишен функционер и кадар на СДСМ, денес излезе со јавна реакција по најавата на партиското раководство за барање за негово исклучување од партијата. Во емотивната порака, тој изрази длабоко разочарување од одлуките на актуелниот претседател Венко Филипче и раководството, истакнувајќи дека не очекувал од својата матична партија да го доведе до состојба во која останува „целосно без зборови и коментар“.
„Искрено, после 30 години политички стаж најмалку очекував токму мојата матична партија да ме остави целосно без зборови и коментар. Во сите јавни настапи сум бил максимално умерен дури и во ситуации и за луѓе кои апсолутно заслужиле остар став. Ако таа умереност сега станува закана за актуелниот партиски врв тогаш СДСМ има многу поголем проблем отколку што и мислиме“ – напиша Деспотовски.
Тој директно му се обрати на Филипче, нагласувајќи дека партијата имала и ќе има личности поголеми од актуелниот претседател.
„СДСМ имала и ќе има многу поголеми личности од актуелниот претседател. И, никој од нив никогаш не се ставил над партијата, над нашето семејство. Тоа не е СДСМ, ниту некогаш ќе биде. Една лична порака за крај или за почеток – Венко, со една одлука не можеш, ниту ќе дозволам да избришеш 30 години работа, љубов и жртва“ – додаде Деспотовски.
Реакцијата на Деспотовски доаѓа во време на ескалација на внатрепартиските тензии во СДСМ, по серијата критики од истакнати членови кон начинот на комуникација и политиките на раководството. Ова е кулминација на кампањата на партискиот Центар за комуникации, кој Деспотовски го обвини за предавство и соработка со ВМРО-ДПМНЕ и ЗНАМ.