Републичкиот совет за безбедност на сообраќајот на патиштата (РСБСП) упати апел до граѓаните за максимално почитување на сообраќајните правила и прописи за време на претстојниот празник 1 Мај и продолжениот викенд.
Оттаму предупредуваат дека продолжениот празничен викенд традиционално се користи за патувања, излети во природа и дружења со семејството и пријателите, поради што се очекува зголемена фреквенција на возила на патиштата низ државата.
„Сообраќајот не е место каде што треба да се троши вишокот на адреналин. Последиците и загубите од сообраќајните незгоди се премногу сериозни, честопати фатални и ненадоместливи, за да може кој било да си дозволи неодговорно однесување во сообраќајот“, соопштија од РСБСП.
Потсетуваат дека искуствата од изминатите години покажуваат дека токму за време на празници и продолжени викенди често се случуваат сообраќајни незгоди со тешки, па и фатални последици.
Советот нагласува дека во сообраќајот нема мали и големи грешки и дека секое невнимание или непочитување на правилата може да заврши трагично.
„Бидете одговорни учесници во сообраќајот и придонесете доброто празнично расположение да трае и по завршувањето на празниците. Преземете мерки за ваша безбедност и за безбедноста на другите учесници во сообраќајот“,
пишува во апелот од Советот.
Во пресрет на празникот, се повикуваат граѓаните да возат одговорно, да ја почитуваат сообраќајната сигнализација и ограничувањата на брзината, задолжително да користат сигурносен појас, да не користат мобилен телефон додека управуваат со возило и во никој случај да не седнуваат зад волан под дејство на алкохол.
Дополнително, од Советот препорачуваат патувањата да се планираат однапред и за време на подолгите релации да се прават паузи за одмор.
„#ВОЗИОДГОВОРНО – Секој живот е важен“, порачуваат од РСБСП од каде им посакуваат на граѓаните безбеден и пријатен продолжен првомајски викенд