Советот за етика во медиумите на Македонија (СЕММ) упати јавен апел до медиумите за одговорно и избалансирано известување во врска со протестите што следеа по стапувањето во сила на системот за контрола на сообраќајот „Safe City“.
Од СЕММ посочуваат дека при известување за протести, особено кога тие се поврзани со маргинализирани заедници или со барања што можат да бидат спротивни на закон или да ја загрозат јавната безбедност, неопходно е да се прикаже пошироката слика. Наместо сведување на настаните на изолирани инциденти, медиумите имаат одговорност да понудат контекст што ќе ѝ овозможи на јавноста да ја разбере комплексноста на ситуацијата.
Воздржаноста, како што наведуваат од Советот, претставува морален императив во новинарската професија, но таа сама по себе не е доволна. Новинарите и уредниците треба јасно да ги идентификуваат и именуваат неприфатливите појави, притоа внимавајќи тоа да не се претвори во колективна осуда, стигматизација или поедноставен наратив што ги брише индивидуалните одговорности.
СЕММ предупредува дека отстапувањето од професионалните стандарди преку сензационалистички наслови, редукционистички интерпретации или прекумерно нагласување на идентитетски обележја може дополнително да го зголеми ризикот од поларизација и ширење говор на омраза. Таквите пристапи, дури и кога не се намерни, го менуваат начинот на кој темата се чита и коментира во јавноста и можат да придонесат кон легитимирање на стигматизацијата.
Затоа, од Советот нагласуваат дека изборот на наслови, формулации и визуелни материјали мора да биде особено внимателен, особено кога станува збор за теми за кои однапред е јасно дека можат да предизвикаат силни и поделени реакции.
Целта на ваквиот пристап, посочуваат од СЕММ, не е релативизирање на законите или оправдување на спорни барања, туку обезбедување јавна расправа што ќе остане насочена кон решенија, одговорност и јавен интерес, наместо кон продлабочување на општествените поделби.