Денеска започна реконструкција, надградба и проширување на охридскиот аеродром „Св. Апостол Павле“ – првото големо интервенирање на објектот од неговата изградба.
Вицепремиерот и министер за транспорт и врски, Александар Николоски, истакна дека со новите градежни работи аеродромот ќе добие дополнителни 4.500 метри квадратни функционален простор, што претставува зголемување од околу 2.500 метри квадратни во однос на постојниот капацитет.
„Тоа ќе значи можност за многу повеќе патници, кои ќе се чувствуваат попријатно кога слетуваат и полетуваат од охридскиот аеродром. Ова е значајно за развојот на туризмот, бизнисот и поврзаноста на регионот“, рече Николоски.
По добивањето на концесијата од страна на ТАВ, аеродромската писта веќе беше проширена и модернизирана, а оваа реконструкција претставува ново ниво на надградба на целиот аеродромски комплекс.
Инвестицијата се реализира во повеќе фази. Николоски посочи дека покрај видливите градежни работи, се реализираат и голем број споредни инвестиции.
„Прво, тука се активностите на М-НАВ поврзани со безбедноста на небото и контролата на летањето, каде што еден модерен радарски систем веќе е интегриран и работи. Интензивно се работи и на Скопскиот аеродром. Понатаму, изградбата на автопатот Охрид–Кичево, кој е дел од Коридор 8 – овој дел е веќе завршен, па од Охрид до аеродромот се стигнува за само пет минути, а од Струга за десетина минути. Големата клучка што е изградена зад нас ќе обезбеди брз и удобен пристап до аеродромот“, истакна вицепремиерот.
Тој додаде дека голем напредок е постигнат и во експанзијата на летовите.
„Со поддршка на премиерот Мицкоски воведовме нова политика на привлекување на нови дестинации преку прилагодена политика на субвенционирање. Резултатите се видливи: од доаѓањето на оваа влада отворени се 24 нови дестинации од скопскиот и охридскиот аеродром. Она што е особено важно е дека почнуваат да се отвораат дестинации и без субвенции, што значи дека интересот на авиокомпаниите расте“, рече Николоски.
Тој ги презентираше и конкретните бројки за патничкиот сообраќај:
„Минатата година само скопскиот аеродром помина преку 3 милиони патници, а вкупно на двата аеродроми беа над 3 милиони и 350 илјади. Оваа година очекуваме над 3,5 милиони, а следната година таргетираме над 4 милиони патници на двата аеродроми. Тоа е огромен успех за држава со еден милион и осумстотини жители која нема излез на море“, заклучи вицепремиерот Николоски.