Поранешниот градоначалник на Скопје од СДСМ, Петре Шилегов, удри по партискиот лидер Венко Филипче, во интервјуто во рамките на емисијата „Топ тема“ на ТВ Телма.
„Да ја сведете поддршката на партијата на само стотина илјади гласови и само 15 пратеници, да станете пета партија во Скопје, трета во Македонија, што е тоа ако не катастрофа?“, праша Шилегов, најавувајќи ерозија и на сегашната партиска номенклатура по следниот конгрес.
„Ќе дојде до определени барања не само од моја страна, туку од сериозна групација во партијата, меѓу кои има и актуелни пратеници, кои исто така немаат никаква комуникација со раководството. Кога ќе излезат од партијата дел од пратениците, можеби половина од пратеничката група, кога дел од општинското раководство ќе ви ги затвори вратите, тогаш ќе сфатите дека мора да си заминете од функција“, му порача Шилегов на Филипче.
„Венко сам си носи одлуки“, додаде некогашната „перјаница“ на СДСМ, уверен дека партиските тела воопшто не ни донеле одлука за поддршка или не на системот „Безбеден град“.
Шилегов ги отфрли и обвинувањата од СДСМ дека „одработува за ВМРО-ДПМНЕ“: „Кога немате што да му одговорите во тезите на Шилегов, ќе измислувате сè и сешто, дека како адвокат сум работел за вмровски претпријатија, дека сум пиел. Тоа е резултат на немање аргументи. Јас очекувам такви напади и по ова интервју, особено на социјалните мрежи“.