„Независноста на Народната банка е клучот за задржувањето на високото ниво на доверба и кредибилитет што институцијата го ужива во јавноста, особено во услови на зголемена неизвесност и високи ризици”, истакна гувернерот на Народната банка д-р Трајко Славески на високата конференција „Централното банкарство во услови на високи ризици: стабилност, инфраструктура и доверба”, организирана од Централната банка на Црна Гора по повод 25-годишнината од нејзиното основање.
Говорејќи за предизвиците со кои се соочуваат централните банки, Славески посочи дека последните кризи и геополитичките тензии покажаа колку се важни кредибилните политики, транспарентноста и јасната комуникација со јавноста. Тие се од суштинско значење за закотвувањето на инфлациските очекувања, стабилизирањето на финансиските пазари и ефикасното спроведување на монетарната политика. Ова е особено важно за малите и отворени економии како земјите од Западен Балкан, кои се силно изложени на светските економски и геополитички случувања. Затоа централните банки треба постојано да ја зајакнуваат својата отпорност, институционалниот кредибилитет и способноста за навремено справување со новите ризици.
Во панел-дискусијата „Кредибилитетот, просторот за водење политики и усогласувањето со ЕУ, во услови на зголемени ризици”, на која учествуваа гувернери од регионот, Славески се осврна на европската интеграција и економската конвергенција. Тој истакна дека централните банки треба уште повеќе да ги зајакнуваат монетарната и финансиската стабилност, институционалниот кредибилитет и отпорноста, како и да продолжат со усогласувањето со европските стандарди. Земјите кандидатки треба да ги продолжат структурните реформи што се клучни за зголемување на продуктивноста и подобрување на животниот стандард.
„Според процените на ММФ, со затворањето на половина од реформскиот јаз во однос на најнапредните економии од Централна, Источна и Југоисточна Европа би можело да се зголеми нивото на БДП на среден рок за околу 14%, за што најмногу би придонесле подобрувањето на пазарот на труд и човечкиот капитал, деловното окружување и квалитетот на управувањето”, истакна Славески.
Во контекст на европската интеграција, тој нагласи дека процесот на пристапување кон ЕУ треба да биде заснован строго на заслугите, со јасни критериуми и нивна доследна примена. Земјите кандидатки треба да бидат сигурни дека со исполнувањето на договорените критериуми целта ќе биде постигната и дека тоа ќе води кон следниот чекор.
Во услови на зголемена светска неизвесност, зачувувањето на независноста, кредибилитетот и довербата во централните банки е од суштинско значење за стабилноста на економиите и за создавање услови за одржлив економски развој.