За денес, 22 август 2025 година во рамки на програмата на Струшките вечери на поезијата е предвидено во 9 часот и 30 минути поетско читање на поетите од потесниот избор за наградата „Браќа Миладиновци“ за 2025 година, во 10 часот поетско кафе со добитникот на „Златен Венец“ на СВП за 2025 година Иван Штрпка, а во 11 часот и 30 минути портрет на академик Катица Ќулавкова, добитникот на наградата „Браќа Миладиновци” за 2024 за најдобрата поетска книга меѓу две изданија на фестивалот „Небото ми е дома“, која излегува во превод на англиски јазик.
Во 12 часот и 30 минути ќе биде претставен и портретот на добитникот на „Мостови на Струга“ за 2025 година Матеуш Шимчик од Полска. Во 14 часот и 30 минути ќе се одржи поетско читање – современа македонска поезија,
Во 18 часот ќе бидат претставени книгите објавени во едицијата Плејади – Антонела Анеда од Италија, а полчас потоа и тематската антологија „Дионис и Свети Трифун“ (панорама на современата македонска винска поезија). Во 22 часот во рамки на Струшкиот фестивал на поезијата ќе биде одржано и меѓународното поетско читање „Кругови“. За во 23 часот и 40 минути е предвидено врачување на наградата „Млада Струга“ за 2025 година, а веднаш потоа и „Ноќ без интерпункција“ како изведба на музика и поезија.
Новина годинава е враќањето на препознатливите содржини, како што се читањата кај споменикот на Свети Климент на плоштадот во Охрид и патувањето со брод и поетското читање во „Свети Наум“. Поетското матине годинава ќе биде во предворјето на црквата „Света Богородица Перивлепта“ во Охрид. Покровител на манифестацијата е претседателката на Република Македонија Гордана Силјановска-Давкова, а како национална установа е финансирана од Министерството за култура и туризам.